გვერდების რაოდენობა: 174
ყდა: რბილი 

ტარა სელტერისთვის დრო 18 ნოემბერს გაჩერდა. ბუკინისტური წიგნების საყიდლად პარიზში ჩასულმა ტარამ, ამ უცნაურობას რომ ვერაფერი გაუგო, გადაწყვიტა სახლში დაბრუნებულიყო. თავიდან ქმართან, ტომასთან ერთად სცადა დროის მარყუჟის გახსნა, თუმცა ბოლოს სტუმრის ოთახში განმარტოვდა და იქ განაგრძო გამოსავლის ძებნა. გავა დრო და ტარა სხვა სახლში გადავა, დროის ჩამოშლიდან ერთი წლის თავზე კი პარიზში დაბრუნდება. და რაკი ცხოვრება ვერა და ვერ დაუბრუნდა ჩვეულ კალაპოტს, ტარა შვედეთში მიდის ზამთრის სანახავად, შემდეგ ინგლისში გაზაფხულს ეძებს, საფრანგეთის სამხრეთში კი - ზაფხულს. იქნებ ოთხივე სეზონის თავმოყრით წელიწადი შეიკრას და გამოსავალიც გამოჩნდეს? ან იქნებ მშობლები დაეხმარონ, რომლებთან ერთადაც შობის აღნიშვნა წინსწრებით გადაწყვიტა? ან იქნებ ის კაცი ამოახსნევინებს თავსატეხს, უნივერსიტეტში რომ გაიცნო და შეხვედრა დაუნიშნა?

თუ ამ შვიდტომეულის პირველ წიგნში სოლვეი ბალე ჩამოშლილი დროის საძირკველს აგებს, მეორე წიგნში ის უკვე საფუძვლადაა ქცეული და ფილოსოფიურ ჭვრეტაზე გადადის. მინიმალისტური თხრობის სტილით ის აუარებელ თემას ყოველი მხრიდან მოუვლის, დაგვაფიქრებს და შეკითხვებს დასვამს; ზოგ მათგანზე პასუხს იპოვის, ზოგზეც - ვერა. არც ეკოლოგია გამორჩება, არც კლიმატური ცვლილება, სამყაროში ჩვენს ადგილზეც დაგვაფიქრებს, ახალი ტექნოლოგიებით შეცვლილ ჩვენს ყოველდღიურობაზეც.

„დროისა და სივრცის მიღმა“ ბევრად მეტია ვიდრე დროის ჩამოშლა. „დროისა და სივრცის მიღმა“ დროში გახსნილი სივრცეა“, - ამბობს კარლ უვე კნაუსგორი.